ఎంత అప్డేట్ అయినా ఈ ప్రపంచం షాకులివ్వడం మానదు !
,,…………………………………….. …………………………
Vasireddy Amarnath…✍️
ఫిబ్రవరి 20 నుంచి అమెరికాలో పుట్టే పిల్లల విషయంలో ట్రంప్ ఒక ఆర్డర్ జారీ చేసాడు . దీనిపై ఇప్పుడు జడ్జి .. స్టే జారీ చేసాడు .
స్టే జారీ కాక ముందు విషయం.
ఈ ఆర్డర్ ప్రకారం తల్లితండ్రుల్లో ఒకరు కేవలం తాత్కాలిక స్టే పై ఉంటే.. గతంలోలా… ఆ నేలపై పుట్టే బిడ్డకు సహజంగా అమెరికా పౌరసత్వం దక్కదు . దీంతో అక్కడ ఉంటున్నవారు… ఏడో నెలో.. లేదా, ఎనిమిదో నెల అయినా పర్వాలేదు.. సిజేరియన్ చేసి బిడ్డను ఫిబ్రవరి 19 లోగా తీసెయ్యండని ఆసుపత్రులకు వెళుతున్నారట.
తెలుగులో ఒక తిట్టుంటుంది . “నెల తక్కువ వెధవా” అని.
ఆ రోజుల్లో శాస్త్రం అభివృద్ధి చెందక పోయినా పరిశీలన ద్వారా చాల విషయాలు కనిపెట్టారు . తొమ్మిది నెలలు నిండకుండా శిశువును ఇలా బయటకు తీస్తే ఆ బిడ్డకు… ఆటిజం, ఏడీహెచ్దీ, బలహీనమయిన ఇమ్మ్యూనిటీ, ఆస్తమా, డయాబెటిస్ లాంటి అనేక ఆరోగ్య సమస్యలొచ్చే ప్రమాదముంది. తల్లి ప్రాణానికి కూడా ప్రమాదం.
చచ్చినా పర్వాలేదు, అమెరికా గ్రీన్ కార్డు వస్తే చాలు అనుకునేవారిని చూస్తే… ఈ ప్రపంచం ఎప్పటికీ అర్థం కాదేమో అనిపిస్తుంది!
ఎంత అప్డేట్ చేసుకున్నా తెలిసింది గోరంత.. తెలియాల్సింది కొండంత… అన్నట్టుంది పరిస్థితి.
మొన్న మలేషియాలోని మా కజిన్… “మలేషియా, ఆస్ట్రేలియా లోని అమ్మాయిల్లో సగానికి పైగా పెళ్లి చేసుకోవడానికి ఇష్టపడం లేదు” అని వాట్సప్ లో చెప్పింది. సెక్స్ శారీరిక అవసరం. అందునా 20 నుంచి 40 మధ్య వయసులో ఇది గరిష్టంగా ఉంటుంది. పెళ్లి చేసుకుంటేనే.. లేదా, కనీసం బాయ్ ఫ్రెండ్ ఉండి వారు లివ్ ఇన్ లో ఉంటేనే.. సెక్స్ అవసరం తీరుతుంది. కానీ, బాయ్ ఫ్రెండ్ కూడా వద్దు అంటున్నారని చెప్పింది మా కజిన్. మరి ఇన్ని వేల మంది అమ్మాయిలు సెక్స్ అవసరాన్ని ఎలా తీర్చుకొంటున్నారు ? ఈ విషయం పై శోధిస్తే కొత్త లోకం ఒకటి కనిపించింది.
అదే సెక్స్ టాయ్స్!
ఎప్పటినుంచో దీని గురించి తెలుసు .
కానీ ఆన్లైన్ షాపింగ్ పుణ్యమా అంటూ ఇండియాలో కూడా ఇది లక్షల బిజినెస్ అయ్యిందని నిన్ననే తెలుసుకున్నాను .
సెక్స్ టాయ్స్ ఎవరు కొంటున్నారు? అని కాదు ఇప్పుడు అడగాల్సింది. 25 – 35 వయసున్న వారిలో ఎంత మంది ఇంకా కొనలేదు? అని అడగాలి.
అమ్మాయిలు పెళ్లి వద్దు అనడానికి తల్లితండ్రులు ఒక ముఖ్యమైన కారణం. తల్లితండ్రుల కీచులాట సంసారం చూసిన పిల్లలు .. తమకు ఈ జంజాటం ఎందుకు అనుకొంటున్నారు .
“మీ మేనత్త దొంగ ము … మీ తాత, అవ్వ రాక్షసులు”.. అని పిల్లల చెవిలో జోరీగలా హోరెత్తించే తల్లులు .. ఎదిగిన బిడ్డ ముందే పెళ్ళాన్ని కొట్టే తండ్రులు!
“హోమ్ వర్క్ ఇచ్చారా ? బుక్ తియ్యి .. ఎన్ని మార్కులు వచ్చాయి? తొంబై ఎనిమిది అంటున్నావు.. సిగ్గు లేదా నూటికి నూరు ఎందుకు రాలేదు?” ఆరో తరగతి నుంచి ప్రతి రోజు… సగటు తెలుగు ఇంట్లో వినిపించే మద్దెల దరువిది!
పండగలు, పబ్బాలు లేక… బంధువుల ఇళ్లకు వెళ్లక.. ఐఐటీ సీట్ అటుపై… గ్రీన్ కార్డు… ఇదే ఈ జన్మకు లక్ష్యం అని పెరిగిన పిల్లలు .
ఇంత టార్చర్ భరించి కష్టపడి ఉద్యోగం సంపాదించాక జాబ్, సాలరీ… ఈ రెండో లోకంగా కన్పిస్తుంది అంటే తప్పెవరిది.. ?
“పెళ్ళొద్దు .. మీరు ఛస్తే ఏజెన్సీకి డబ్బులిస్తే వారు వచ్చి ఏడ్చి పాడేకట్టి సాగనంపుతారు. అందాకా ఇదిగో నెలకు ఇంత అని ఇస్తా. ఎక్కడైనా ఓల్డ్ ఏజ్ హోమ్ లో ఉండు” అని చెప్పే కొడుకు, కూతురు కాక మరి ఎలాంటి వారు తయారవుతారు ?
చేసుకున్నవారికి చేసుకున్నంత!
జనాల్లో వస్తున్న మార్పులను గమనించి దాన్ని క్యాష్ చేసుకొనే వారెందరో ! గంజాయి షాప్స్, మగ సెక్స్ వర్కర్స్, మానసిక వైద్యులు, వృద్ధాశ్రమాలు, కాన్సర్ ఆసుపత్రులు, ఆటిజం, థెరపీ కేంద్రాలు, విడాకుల లాయర్లు, కాంట్రాక్ కిల్లర్స్ .. రానున్న రోజుల్లో మూడు పూవులు ఆరుకాయలుగా వెలుగొందనున్న వృత్తులు,వ్యాపారాలు!
కేరళలో పదకొండో తరగతి విద్యార్థి ప్రిన్సిపాల్ ను అతని ఛాంబర్లోనే… తన సెల్ ఫోన్ ఇవ్వకపోతే బయట చంపేస్తానని బెదిరించాడు. అతని చేత బలవంతంగా సారీ చెప్పించి విషయాన్ని ముగించేశారట. పైగా వీడియో బయట పెట్టడం తప్పు అని ప్రిన్సిపాల్ కే చీవాట్లట. సెల్ ఫోన్ దారుణాలు మితిమీరుతున్నా… తల్లితండ్రులు, టీచర్స్, ప్రభుత్వాలు .. అది అసలు సమస్యే కాదన్నట్టుగా ప్రవర్తిస్తున్నాయి.
పారాయణ కాలేజీ విద్యార్థి నేరుగా క్లాస్ రూమ్ నుంచి బయటకు వెళ్లి కిందకు దూకి మరణించాడు.ఆ వీడియో వైరల్ అయ్యింది. ఇలాంటి ఘటనలు సర్వసాధారణం అయిపోయాయి. కానీ వారి అడ్మిషన్స్ కు ఏమీ డోకా ఉండదు . తల్లితండ్రులకు చీమ కుట్టినట్టు అయినా ఉండదు. ఆత్మహత్యల కాలేజీలో చేర్పించారు సరే, ఇలాంటి ఘటనలు జరిగినప్పుడైనా..” బాబు / అమ్మా.. ఒత్తిడికి గురి కాకు.. చదివినంత వరకు చదువు… ఏదైనా ఇబ్బంది ఉంటే నాకు చెప్పు…” అని కనీసం తల్లీ, తండ్రి చెప్పారా ?
అయినా నా పిచ్చి గానీ… మా స్లేట్ తిరుపతిలో గత సంవత్సరం ఏడో తరగతిలో ముగ్గురు విద్యార్థులు టీసీ తీసుకొన్నారు . ” మా పిల్లలు బాగానే చదువుతున్నారు. కానీ, మీరు ఒత్తిడి తీసుకొని రావడం లేదు. ప్రెషర్ పెడితేనే చదువు” అంటూ.. వారు తమ పిల్లల్ని కార్పొరేట్ లో చేర్పించారు. మా అమ్మాయిని రాచి రంపాన పెట్టి అయినా… ఎలాగైనా ఐఐటీ సీట్ కొట్టేలా చేయండి ” అని తల్లితండ్రులే అంటే ఇక వారికి అడ్డు చెప్పేవారు ఎవరు ?
అదే తిరుపతి లో గత సంవత్సరం పది చదివి… ఇప్పుడు కార్పొరేట్ జూనియర్ కాలేజీ లో చదువుతున్న ఇద్దరు అమ్మాయిలు మొన్న కలిశారు.” సార్ అమ్మాయి అని కూడా చూడకుండా క్లాసులో లెక్చరర్స్ బూతులు మాట్లాడుతారు . మూసుకొని కూర్చోండి. క్లాస్ బయటకు దె.. యండి, ఇలాంటి మాటలు అక్కడ సహజం అని కన్నీళ్లు పెట్టుకున్నారు.
పిల్లాడు ఓటిటి చూసి బూతులు నేర్చుకొంటే ముందుగా అమ్మను, అబ్బను … అమ్మనా బూతులు తిడుతాడు. అటుపై బడిలో టీచర్స్ ను తోటి విద్యార్థుల్ని!
ఓటిటి బూతుల్లో పెరిగే బుల్లి రాజుకు నాన్నంటే ప్రేమ… నాన్నను ఎవరైనా ఏదైనా అంటే సహించడు అనే కృత్రిమ బూతు హాస్యానికి పడిపడి నవ్వి … పిల్లాడు బూతులు నేర్వడం మోడరన్ ట్రెండ్ అనుకునే తల్లితండ్రులకు… తమ జీవితాల్లో సంక్రాంతి, దీపావళి రాదు.. వచ్చేది సునామే అని తెలియడానికీ ఎక్కువ కాలమూ పట్టదు!
